പ്രണയകഥകളുടെ തമ്പുരാന് ആ‍ദരവേകി ഒന്‍പത് സുന്ദരിമാര്‍ റാമ്പില്‍ ചുവടുവച്ചത് ബോളിവുഡിന് പുതുമയായി. സംവിധായകനും നിര്‍മാതാവുമായിരുന്ന യാഷ് ചോപ്രയുടെ ജന്മദിനത്തിലാണ് അദ്ദേഹത്തിന്റെ ഹിറ്റുകളിലെ നായികമാര്‍ ഒത്തു ചേര്‍ന്നത്. യാഷ് ചോപ്ര അന്തരിച്ചിട്ട് ഒക്ടോബര്‍ ഇരുപത്തിയൊന്നിന് ഒരു വര്‍ഷം തികയുകയാണ്. അദ്ദേഹത്തിന്റെ എണ്‍പത്തിയൊന്നാം ജന്മദിനമായ സെപ്റ്റംബര്‍ ഇരുപത്തിയേഴിനാണ് ‘ദിവാനി’ എന്ന പേരില്‍ സംഘടിപ്പിച്ച ഫാഷന്‍ ഷോയിലൂടെ താരസുന്ദരിമാര്‍ സ്മരണാഞ്ജലി അര്‍പ്പിച്ചത്. ഇന്‍ഡ്യന്‍ സിനിമയ്ക്കു പ്രണയത്തിന്റെ ചാരുത പകര്‍ന്ന ചോപ്രയുടെ ഇഷ്ടനായികമാരായിരുന്ന രേഖ, ശ്രീദേവി, മാധുരി ദീക്ഷിത്, റാണി മുഖര്‍ജി, ജുഹി ചൌള, പ്രിറ്റി സിന്റ, കത്രീന കൈഫ് എന്നിവരാണ് അനുഷ്ക ശര്‍മ, പരിണീതി ചോപ്ര എന്നിവരോടൊപ്പം റാമ്പില്‍ ചുവടുവച്ചത്. അനുഷ്ക നര്‍ഗീസിനെയും പരിണീതി മധുബാലയെയുമാണ് പ്രതിനിധീകരിച്ചത്.
യാഷ് ചോപ്രയുടെ ഭാര്യ പമീല ചോപ്രയാണ് യാഷ് രാജ് സ്റ്റുഡിയോയില്‍ ഈ ഷോ സംഘടിപ്പിച്ചത്. സൂപ്പര്‍ സ്റ്റാര്‍ ഷാരൂഖ് ഖാനും സുന്ദരിമാര്‍ക്കൊപ്പം ചുവടുവച്ച ഷോയില്‍ ഓരോ നടിയും സ്റ്റേജില്‍ എത്തുമ്പോള്‍ അവര്‍ അഭിനയിച്ച ചോപ്രയുടെ സൂപ്പര്‍ഹിറ്റ് സിനിമകളിലെ ഗാങ്ങളുടെ ഈരടികള്‍ അലയടിച്ചു. നഷ്ടവസന്തത്തിന്റെ ഓര്‍മകള്‍ ഉണര്‍ത്തിക്കൊണ്ട് ‘ദിവാനി’ അവസാനിക്കുമ്പോള്‍ യാഷ് ഇപ്പോളും ബോളിവുഡിന്റെ മനസ്സില്‍ ജീവിക്കുന്നു എന്ന പ്രഖ്യാപനമാണ് ഉയര്‍ന്നത്.
[inpost_gallery post_id=1703 group=’all’ thumb_width=100 thumb_height=100]